MWIBA ARSENAL NASRI KUHAMIA OLD TRAFORD

SAMIR Nasri mchezaji timu ya Arsenal
LONDON, ENGLAND
SAMIR Nasri ameishangaza Arsenal baada ya kusema kuwa anaweza kuhamia Manchester United katika kipindi cha usajili.
Tetesi kwamba mchezaji huyo amekataa kusaini mkataba mpya katika klabu hiyo ili ahamie katika timu nyingine zimeendelea kuvuma kwa muda mrefu na sasa limeangushwa bomu jipya baada ya kubainika kwamba mchezaji huyo anaweza kuhamia Manchester United.

Mwiba mkali zaidi kwa kocha Arsene Wenger ulikuja baada ya Patrice Evra kusema kuwa mchezaji huyo atajiunga na kikosi cha kocha Alex Ferguson.

Nasri mwenye umri wa miaka 23, atamaliza mkataba mwishoni mwa msimu ujao na Wenger hawezi kumwacha aondoke bure atataka amuuze na kupata fedha. Mchezaji huyo alisema: "Je ninataka kwenda Manchester United? Kwanza natakiwa kujua kama nia yao ni thabiti na baada ya hapo nitafahamu kinachoendelea."

Nasri amesema kuwa hakuna kilichoamuliwa kwa sasa, labda atapata mwelekeo baada ya mechi za timu yake ya Ufaransa dhidi ya Ukraine and Poland.

Alisema: "Sifahamu kama nitasaini mkataba mpya au la, majadiliano yanaendelea. Kwa sasa sifikirii juu ya jambo hilo, nitazungumza baada ya mechi dhidi ya Poland."

Wenger aliwahi kusema kuwa fedha ndio kitu kinachofanya mazungumzo yasifike hatua nzuri. Wenger aliiambia redio moja ya Ufaransa hivi karibuni: "Hatujakubaliana katika masuala ya fedha, lakini tutaangalia mambo yatakavyokuwa."
Inafahamika kwamba Manchester United inaendelea kuangalia mwendo wa mazungumzo ya mchezaji huyo.