young atua man u

LONDON, ENGLAND
HATIMAYE Alex Ferguson amemnasa Ashley Young kwa ada ya Pauni 20 milioni ambazo ni sawa na Sh.40 bilioni za Tanzania. Hilo ni pigo kwa wapinzani wa Manchester United, ambao alikuwa wakimwania mchezaji huyo kwa karibu.
Kutua kwa mchezaji huyo kutoka Aston Villa ni mwanzo tu wa matumizi ya Alex Ferguson msimu huu huku lengo la kocha huyo likiwa ni kujenga kikosi kipya na imara zaidi.
Young, mwenye umri wa miaka 25, juzi Alhamisi alifanyiwa vipimo vya afya katika uwanja wa mazoezi wa Carrington na alionekana yuko fiti kabla ya kumwaga wino katika mkataba wa miaka minne.
Nyota huyo sasa anajiunga na Phil Jones ambaye alijiunga na klabu hiyo akitokea Blackburn, Jumatano wiki hii kwa ada ya Pauni 16.5 milioni.
Katika hatua nyingine, kipa David De Gea anayedakia Atletico Madrid naye atatua katika kikosi hicho kwa ada ya Pauni 18.5 milioni baada ya mazungumzo ya pande mbili kukamilika.
Siku zote Ferguson hupenda kuhakikisha mambo aliyopanga yanakwenda kama anavyotaka, lakini usajili huu umeshangaza wengi kwa kuwa umefanyika haraka, ikiwa ni wiki mbili tu tangu kumalizika kwa Ligi Kuu.
Licha ya kupata ubingwa wa Ligi Kuu England msimu uliomalizika, kocha huyo anafahamu kikosi chake kinatakiwa kutengenezwa upya ili kicheze kwa uhakika na si kubahatisha.
Msimu uliomalizika, timu haikuwa ikifanya vizuri katika mechi za ugenini na hicho ni kitu kinachompa shaka kocha huyo.
Ferguson amempiku kocha wa Liverpool, Kenny Dalglish, ambaye alikuwa akimsaka mchezaji huyo tangu Januari mwaka huu.
Young sasa anaweza kucheza kama winga au mshambuliaji. Mchezaji huyo ataongeza chachu katika kikosi hicho ambacho tayari kina washambuliaji wazuri.
Young alitengeneza jina akiwa Watford kabla ya kuhamia Aston Villa kwa ada ya Pauni 8 milioni, Januari 2007.
Alicheza mechi 193 na amefunga mabao 39, vilevile amesaidia upatikanaji wa mabao 54. Kuwasili kwa mchezaji huyo kutatoa wasiwasi kwa nafasi ya Louis Nani.
Hata hivyo, Nani raia wa Ureno alikuwemo katika orodha ya wachezaji waliowania tuzo lakini hivi karibuni kulikuwa na habari kwamba anataka kuondoka katika klabu hiyo.